Gielddastivralanjas, Deanu ráđđevisttis
"Vádjoleapmi Deanus" – rabas čoahkkin gaskavahko geassemánu 8. beaivve
Dákko bokte bovde Deanu gielda rabas čoahkkimii vázzinbálgáid birra Deanu gielddas. Buohkat geat beroštit bálgáin, ja áinnas bálgáid merkemiin, leat buresboahtimat oassálastit čoahkkimii. Álgosáhkavuoru dollet sátnejođiheaddji Frank M. Ingilæ, Per Holm-Varsi Sirpmá gilisearvvis ja Arnt Ove Andersen Gáisá næringshages.
Govva: Line Iversen, 2005
Govva: Line Iversen, 2005
Ulbmil čoahkkimiin lea bidjat johtui álbmogassii barggu oažžun dihtii gieldda vázzinbálgáid eambbo oidnosii, nu ahte geavahuvvojit eambbo. Gielda ávžžuha maid giliservviid lágidit oktasašmátkkiid Deanuriemuid olis gaskkal suoidnemánu 1.-10. beaivve (dahje geasi mielde) ieš guđetge báikkiin Deanus.
Per Holm-Varsi Sirpmá gilisearvvis muitala Sirpmá kulturbálgá birra. Sátnejođiheaddji fas doallá smávva sáhkavuoru ieš guđetge báikkiid birra gosa sáhttá vázzit Deanus, ja Gáisá næringshage Arnt Ove Andersena bokte, muitala fas “Vádjoleami” birra – ahte mo dat lea vuoruhansuorgin.
Dehálaš ášši čoahkkimis lea bálgáid merkema birra. Gielda lea várren veahá ruđa dán hommái. Mii ságastallat dan birra mo bálgáid sáhttá merket, ja juohkit giliservviide Den Norske Turistforeninga merkengiehtagirjjáža, jus dáhttot dan.
Sávvat ahte juohke gilisearvvis boađášedje muhtumat, muhto olmmoš ii dárbbaš gullat makkárge searvái ahte sáhttit boahtit čoahkkimii. Eaŋkilolbmot geat háliidit ahte nu ollugat go vejolaš besset “Vádjolit Deanus”, leat maid dehálaččat dán oktavuođas.
Buohkat leat buresboahtimat!
Geahča prográmma mii lea mielddusin!
Vádjoleapmi Deanus. Álbmotčoahkkima prográmma 08.06.2011 (dárogillii).pdf