Stálu bártnit leat fas dánsumin, sii leat hui váibmilat varrii, erenomážit olbmománáid varrii. Luhtták lea fas bivdimin mánáid, seammá lea stállu.
Sunná šiella
Deanu kulturskuvla čájeha čájálmasa Sunná šiella maid Inger Margrethe Olsen lea čállán. Dáinna čájálmasain finai kulturskuvla Duiskkas geassit ja ovddastii Norgga máilmmi mánáidteáhterfestiválas. Čájálmas lea mánáid- thriller gos čuovvut dan golbma máná Sunná, Májjá ja Mihkkala go sii mannet eatnanvullosaččaid máilbmái, gos Luhtták ráđđádallá. Luhtták váldá Sunná veagal, ja bágge su juhkat vara, nu ahte son vajálduhttá gii son lea. Nagoda go Májjá ja Mihkkal oažžut su ruoktot? Sáhttá go Čáhkalakkis, guhte buosku ruđaid, veahkehit? Stállu lea nealggas. Borro go son Sunná ovdal go veahkit jovdet? Klemet Anders Buljos lea ovddasvástádus musihkkii, ja Inga Juuso neaktá áhku, ja juoigá luođi mas lea stuora mearkkašupmi. Generálageahččaleapmi dulkojuvvo simultánalaččat gieldda dulkonrusttega bokte. Bileahttahaddi: 50,-. Čájálmas čájehuvvo maiddái 03.03, muhto dalle čájehuvvo dušše BOAĐE- festiválaoassálastiide. Mii sávvat buot deatnulaččaide buresboahtima maŋŋebárgga tiibmu 17:00.