Ođđasat geaidnonamaid birra Deanus

4. mai 2010 av Lars Smeland

Smiehtadat go manne Deanus áigot namahit geainnuid, guđe geainnuid ja mo dat dahkko? Čuovvovaš artihkal geahččala buktit vástádusaid.

Deanu gielddas leat máŋga namahis geainnu. Dát buktá váttisvuođaid go politiijat, buohcci- dahje buollinčáskadanbiillat galget dádjat rivttes sadjái, go poasta galgá buktit gálvvuid ja poastta jna. Danin lea hui dehálaš mearridit namaid namahis geainnuide gielddas. Seamma láhkai go báike- ja gilinamaid, de lea gielda mii mearrida geaidnonamaid gielddas.

Guhkes proseassa

2004 čavčča bivddii Deanu gielda giliservviid buktit evttohusaid geainnuide main ii lean namma. Ášši digaštallui fas 2008:s go báikenammalávdegoddi (dál bajásšaddan- ja kulturlávdegoddi) mearridii ahte nammaevttohusat galge ođđasit sáddejuvvot gulaskuddamii, ja ahte lei fas vejolaš buktit ođđa cealkámušaid.

Dá lea goallus nammaproseassa máinnašupmái, mii biddjui gieldda ruovttusiidduide 15.12.2008: http://www.tana.kommune.no/tid-for-nye-veinavn-i-tana.4532387-111248.html

Gielddastivra mearridii čoahkkimisttis 12.02.2009 eavttuid mo ođđa almmolaš geaidnonamaid galgá mearridit. Goallus dán dokumentii lea vuolimusas dán artihkkalis.

Báikenammalávdegoddi mearridii čoahkkimisttis 21.04.2009 sáddet 33 geaidnonammaevttohusa nammanevvohahkii. Nammanevvohat galggai buktit álgoevttohusaid čállinvuohkái. (geainnut ja geaidnonamaid gávnnat gollosis vuollelis). Vástádus nammanevvohagas bođii čakčamánus 2009 (sámi nammanevvohat) ja ođđajagis 2010 (dáža nammanevvohat). Gollosa dáidda dokumeanttaide gávnnat artihkkala loahpas.

Otnáš gulaskuddan

Evttohusat geaidnonamaide ja čállinvuohkái dáidda namaide lea dál gulaskuddamis. Dát mielddisbuktá ahte joavkkut ja searvvit, ja maiddái priváhta olbmot, geaidda ášši guoská, sáhttet buktit čálalaš mearkkašumiid namaide ja čállinvuohkái. Gulaskuddan loahpahuvvo miessemánu 27. b. 2010. Maŋŋá go gulaskuddanáigi lea nohkan, sáddejuvvojit nammaevttohusat mat leat boahtán, oktan mearkkašumiiguin, nammanevvohagaide loahpalaš neavvumii. Das maŋŋá galgá bajásšaddan- ja kulturlávdegoddi loahpalaččat gieđahallat, ja mearridit geaidnonamaid čállinvuogi.

Mii fuomášahttit ahte buot eanaeaiggádat priváhta geainnuid guora, maidda galgá mearriduvvot namma, ožžot sierra breava dán ášši birra. Ollu barggu geažil dát breavat eai leat vel sáddejuvvon.