Namakeahtes geainnut Deanus leat ožžon namaid
Bajásšaddan- ja kulturlávdegoddi lea mearridan namaid 24 geidnui gielddas. Dát leat dat vuosttas geaidnonamat mat leat mearriduvvon Deanus masá 20 jahkái, ja danne dát lea stuorra beaivi.
Buohkain leamaš vejolašvuohta buktit nammaevttohusaid máŋgga vuorus. Mearriduvvon namat leamaš gulaskuddamis giliservviin ja leamaš maiddái guktii sámi ja dáru báikenammabálvalusain oažžun dihtii evttohusaid čállinvugiide. Áššis lea guhkes historjá, ja sáhttá guorrat ášši ruovttoluotta gitta 1984/85, go dalle evttohuvvojedje namat 5’ gielddalaš geidnui.
Mearriduvvon namat leat mildosis vuolábealde, oktan geaidnonamaid mearrideami eavttuiguin, maid gielddastivra mearridii guovvamánus 2009.
Váidin
Mearriduvvon geaidnonamaid sáhttet dušše báikkálaš organisašuvnnat, geain lea erenomáš gullevašvuohta báikenammii, váidit. Gielda sáhttá ođđasit geahččat ášši jus bohtet ođđa dieđut mat dagahit dan dárbbašlažžan. (Vrd. báikenammalága § 7 og 10)