Kultureahket guovvamánu 9. beaivve tii. 19:30

Muhto dán eahkeda eat seagut dušše ieš guđet ge musihkkašlájaid. Dáppe leat ieš guđet ge dáiddavuogit seahkálaga. Lea dát mii dagaha kultureahkeda nu erenomážin. Dán háve besset geahččit deaivat joavkku mii bargá máladáidagiin, ja geat áinnas čeavládit čájehit čáppa dáidagasat. Čalbmáičuohcci dán oktavuođas lea čiŋahuvvon skohterreahka. Lassin musihkkii ja govvadáidagii, geahččit besset gullat muhtun divttaid maid muhtumat dán hutkás joavkkus leat ieža čállán. Kultureahket lea dat goalmmát kultureahket mii lea lágiduvvon Deanus. Mis leamaš guokte eahkeda skábman, mat lihkostuvve bures, ja mii gal áigut joatkit lágideames dákkár eahkediid, dadjá kulturskuvlla oahpaheaddji ja musihkkár Sigmund Sætre. Su mielas dákkár eahkedat leat hui buorit arenat daidda geat barget kultuvrralaš bargguiguin Deanus, leš dal musihkka, govvadáidda, girjjálašvuohta dahje eará dáiddalaš ovdanbuktinvuohki. Iežan mielas lea hui miellagiddevaš deaivat eará musihkkáriid, ja oaidnit maid eará dáiddárat hommájit. Čájehuvvo ahte leat ollu taleanttat ja čeahpes olbmot mat gávdnojit gielddas, dadjá son, ja ávžžuha olbmuid fitnat hoteallas dán gaskavahko. Dán olis ávžžuhat maid deatnulaččaid, geat leat ráhkadan dahje hábmen maid nu mas lea dáiddalaš árvu maid háliidit ovdanbuktit, váldit oktavuođa kulturskuvllain, nu ahte besset eará háve searvat dákkár kultureahkedii.