Skoler i Tana

Language Language Language Visning: A A A A A
toppbilde

Hilly Sarre

Duodji ja Hilly

Munnje lea leamaš gieđaid geavaheapmi hui dehálaš oassi iežan eallimis. Mánnán juo ledjen rávis olbmuid mielde praktihkalaš olgo- ja sistedoaimmaiguin sihke garra ja dipma ávdnasiiguin. Mun dovden ahte ohppen ollu praktihkalaš bargguin ja dat lea leamaš hui dehálaš munnje go galggai teorehtalaš oahppu čađahit. Guktot váhnemat leigga hui čeahppi giehtabargguiguin.

Mun bajásšadden Vuolle Deanus , gos ollu diehtu duojis lei juoidá mii dáhpáhuvai dušše ruovttuin ja juoidá man ii rápmon gosa. Sámegielas lei maid vuollegisáigi. Váhnemat geavahedje uhccánat ja uhccánat sámegiela gaskkustangiellan ja sii oaivvildedje ahte ii buot lean nu dehálaš duojis joatkit ođđa buolvvaide. Go jerren iežan váhnemiin, vástidedje sii dávjá ahte dien sii eai máhte.

Mun ledjen dattetge hui sáhkki das mii guoskkai árbevirolašdihtui. Mun válljejin duoji joatkkaskuvllas fágan. Maŋŋá fas mannen Johkamohkkái Ruŧŧii álbmotallaskuvlii ja doppe vásihin hui oahppevaš jagi gos mus lei dušše duodji fágan gos mus lei vuolggasadjin dipmaávnnas.  Dan maŋŋá mun lean čađahan duodjefágaoahpaheaddji oahppu allaskuvllas, doppe deattuhin min duodjeárbevieruid ja mus lei dalle garraduodji. Dan lassin lea mus maid veahá duodjeoahppu sámi allaskuvllas.

Mun lean máŋga jagi jođihan iežan duodjefitnodaga duojárin ja lean álohii háliidan oahppat lasi. Mun lean čađahan muhtun kurssaid ja lean háleštan ollu vuorrasat olbmuiguin vai oahpašin árbevieruid. Nu guhkká go mu čalmmit oidnet ja mu gieđat bihtet, de háliidan oahppat lasi.

Dađi mielde go mun ohppen eanet ja mu váhnemat oidne maiguin mun bargen, de bohte oidnosii dakkár bealit sudnos gos soai čájeheigga iežaska vásáhusain ja muitaleigga dahje čájeheigga mo sii barge daid ieš guđet ge duddjonvugiiguin ja mo sudno mielas galget sávnnjit, hámit ja ivnnit leat. Dalle easkke dovden ahte ledjen joavdan ruoktot.

Mun mielas háliidan doalvut dáidduid ovddos guvlui. Kulturskuvla addá munnje dan vejolašvuođa doalvut dáidduid ovddos guvlui ohppiide geat ieža leat válljen duddjoma ja várra sis lea seamma sáhkkiivuohta mii mus lei mánnán. Duodji addá maid vejolašvuođa riggudahttit iežas giela.

Mun fálan duoji daid boarrásamos ohppiide vuođđoskuvllas gos váldodeaddun lea dipmaduodji, muhto juohke čavčča leat mii meahcis ávnnasteamen, vai sáhttit duddjot smávva dujiid garraávdnasiin jus dakkár lea sávahahtti, muhto dalle duddjojuvvo dušše giehtabargobiergasiiguin. Oahpahusgiellan lea sámegiella.