Girkoválga 2009 Buolbmát ja Deanu suohkanis
Dáppe gávnnat dieđuid ovddalgihtiijienasteami, válgakoarttaid ja jienastuslogu dárkkisteami birra 2009 girkoválgga oktavuođas.
2009 girkoválggain galgá válljejuvvot searvegotteráđđi Buolbmága ja Deanu suohkanis ja 7 miellahtu dábálaš olbmuid gaskkas Davvi-Hålogalandda bismagoddái. Válggat leat čakčamánu 13. ja 14. beaivve 2009.
Ovddalgihtiijienasteapmi:
Áigodagas gaskal borgemánu 10. beaivve ja čakčamánu 11. beaivve 2009
Searvegottekántuvrras Deanušalddis vuossárggas bearjadahkii tii. 0900 – 1500.
Eambbo dieđuid jienasteami áiggi ja báikki birra gávnnat neahttasiiddus www.kirkevalget.no.
Válgakoarta:
Buot miellahtut geain lea jienastanvuoigatvuohta Norgga girkus ožžot válgakoartta ja eambbo dieđuid 32. vahkus. Miellahtut Norgga girkus guhtet eai oaččo válgakoartta poasttas, ávžžuhuvvojit váldit oktavuođa searvegottekántuvrrain, nu ahte sáhttet divvut meattáhusaid mat leat Norgga girku miellahttoregistaris.
Miellahttoregisttar lea vuođđun girkolaš jienastuslohkui. Dat guhte oažžu válgakoartta, muhto ii leat miellahttu Norgga girkus, sáhttá čuovvut bagadusa válgakoarttas mas čilgejuvvo mo sihkuhit iežas eret miellahttoregistaris.
Jienastuslogu dárkkisteapmi: Girkolaš jienastuslohku lea biddjon dárkkisteapmái searvegotti kántuvrii, ja dat lea oaidnimis kántuvrra dábálaš rahpanáiggiin gaskkal borgemánu 10. beaivve ja čakčamánu 11. beaivve. Lea dušše vejolaš dárkkistit dieđuid mat gusket alccesis, dahje geasa nu earái, gii lea addán doaimmahanválddi dárkkistit dieđuidis. Son guhte oaivvilda iežas, dahje muhtun earáid boasttuvuođa geažil čállojuvvon dahje hilgojuvvon suohkana jienastuslogus, sáhttá gáibidit ahte válgastivra divvu meattáhusaid. Gáibádus galgá leat čálalaš ja galgá leat ákkastallon.