Erenomáš somás vahkut
Das rájes go 2010 Deanu dálvemárkanat álggahuvvojedje maŋŋá gaskabeaivve njukčamánu 3. beaivve, leamaš máŋggat erenomáš buorit doalut maidda oassálastit dáppe deanus. Deanu dálveriemut leat áiggi mielde šaddan stuorra kulturdáhpáhussan mat geasuhit ollu olbmuid gildii, ja mainna mii sáhttit duođai čevllohallat.
Nana buorit vásáhusat Deanus
Dát ii livččii menestuvvan jus olbmuin ii livččii positiiva oaidnu dálveriemuide ja dáhttu ahte riemut galget lihkostuvvat. Hálidan giitit: gieldda bargiid, Deanu hotealla, Skiippagurfestivála, kulturskuvlla, joavkkuid ja servviid. ealáhusaid ja buohkaid geat leat bargan eaktodáhtolaččat. Sátnejođiheaddji hálida juogadit muittuidis govaid bokte, maid lea govvidan dálveriemuid áigge - geahča linkka vuolimusas artihkkalis!
Geahčasat veahá ruovttoluotta ja oaidnit mii lea dáhpáhuvvan muhtun dáin doaluin:
Sunná Šiella
Mielahis buorre álgočájálmas teáhterčájálmasas mainna min mánáidteáhterjoavku sáhttá duođai čevllohallat. Teáhteroahpaheaddji ja reššisevra Ebba Joks Deanu kulturskuvllas lea bargan hui buori barggu teáhterčájálmasain maid Inger Margrethe Olsen rohkki lea čállán. Lei galgat jáhkkit ahte neavttárat leat proffešunealla neavttárat, ja eai ge movttegis astoáiggástallit, go beasaimet oaidnit man bures čájáhalle, ja man čáppa biktasat ja lávdi sis lei.
Šiella lea skeaŋka (suorpmas) maid sápmelaččat adde mánáideaset nu ahte dat várjalivččii sin olles eallima. Teáhterjoavku lea mannamin čájálmasain Sunná šiella Máilmmi mánáidteáhterfestiválii Duiskii. Mii sávvat sámi mánáidteáhterjovkui lihku mátkái.
Muohtabázzešillju
Hilly Sarre lea ovttas ruošša nuoraiguin, suoma jiekŋadáiddáriiguin ja Deanu skuvllaid ohppiiguin ráhkadan erenomáš čáppa muohta- ja jiekŋabácciid, maiguin gal duođai sáhttet čevllohallat. sii leat barrgan máŋggaid vahkuid gárven dihtii bácciid, ja lea measta nu ahte olmmoš doaivu ahte giđđa ii oppa boađe ge, nu ahte báccit eai sutta...
DálveSkiippis 2010
Buoremus Dálveskippis mii goassige lea leamaš, lávluiguin ja juigiiguin mat leamaš njulgestaga hirpmástuhtti buorit. Dát ledje buorit doalut dan botta go vurddiimet beanavuddjiid. Olmmoš ferte leat veahá gáigá go lágida konseartta olgun dálvit. In jáhke leat ollugat geat lágidit konseartta olgun go lea lagabui 20 buolašceahki olgun. Ledje boahtán oktiibuot sullii 5-600 olbmo konsertii, ja dat lei njulgestaga hirpmástuhtti.
Finnmarksløpet beanavuodjin 2010
Vuođđun Deanu dálveriemude ja muđui buot doaimmaide dán oktavuođas, leat Finnmarksløpet beanavuodjingilvvut. Finnmarksløpet avvuda dán jagi 30-jagi, ja leat ollu deatnolaččat geat servet gilvvuide. Láhttovuoddjit, ektodáhtolaš bargit ja Deanu joatkkaskuvla leat bargan nana buori barggu nu ahte Finnmarksløpet-gilvvut galget mannat nu bures go vejolaš.
Mediat leat čuvvon gilvvuid hui dárkilit, ja dáppe leamaš TV-stašuvnnat de go NRK, TVNord ja maiddái duiska TV. Áviissat leat maid čállán beanavuodjimiid birra. Deanu gielda lea láhčán dili erenomáš bures NRKii, go lea huksen čáppa jiekŋastudio gos Anne Rimmen lea beassan muitalit beanavuodjima birra. Dasa lassin lea gielda luoikkahan gielddastivralanja ráđđevisttis NRKii máŋga beaivve.
Deanu gielda sávvá lihku Aila Emilie Sarrii go bođii njealljádin Finnmarksløpet 500 km luohkás, ja dan oktavuođas fitnii bronssa norggameašttirgilvvuin beanavuodjimis.
|
|
|
|
| "The Jones Benally Family", lea indiáner-bearaš mii gullá Navaho-álbmogii Flaggstaffas, Arizonas. Sii lávlo ja dánso kulturdoaluin sotnabeaieahket. | Olbmot ledje boahtán geahččat ja sávvat buresboahtima daid vuosttas beanavudjiide geat ollejedje Deanušaldái. Doppe lei gávppaseapmi, njoarosteapmi, gilvočuoigan mánáide, buorre borramuš ja doalut sihke muohtalávddis ja váldolávddis. |
Sátnejođiheaddji dálveriemuid govvaálbum (Sierra linka - rahpasa sierra neahttagovas)
Deanu dálveriemut loahpahuvvojit sotnabeaivve njukčamánu 21. beaivve, ja doalut bistet gitta dan beaivve rádjai.
Muittuhat ahte maŋimuš vahkkuloahpa leat DNM gilvvut čuoigamis Sieiddás (bearj. njukčam. 19 - 21.beaivái), ja Revya "Vinterstøingen" njukčamánu 19. ja 20. beaivve ja maiddái doaibmabeaivi Buolbmágis gaskavahko njukčamánu 17. beaivve.
Deatnu lea dáinna lágiin nannosit ovddidan iežas kultuvralaččat Finnmárkkus.
Ellet dearvan!