Language Language Language Visning: A A A A A
toppbilde

Deanu kulturskuvla Duiskii

Deanu kulturskuvla galgá ohpihii ovddastit Norgga riikkaidgaskasaččat. 11. máilmmi mánáidteáhterfestivála lágiduvvo Duiskkas geassemánus 2010. Teáhterjoavku Soapmásat leat dál bargamin ođđa sámi drámáčájálmasain maid Inger Margrethe Oskal lea čállán: Sunná šiella.
Kristin

Mis leat buorit mielbargit dán buvttadeamis. Riikkaoassejuoigi Inga Juuso oassálastá sihke juoigin ja neavttárin, ja Klemet Anders Buljo ráhkada musihka ja čuojaha čájálmasas. Iežamet duojáris Hilly Sarres, lea ovddasvástádus biktasiidda. Dán háve oažžut veahki Beaivváš sámi teáhteris scenografiijain.

11. máilmmi mánáidteáhterfestivála lágiduvvo Lingenis Duiskkas geassemánus 2010is. Doppe galgá Deanu kulturskuvla oassálastit ja ovddastit Norgga ja Sámi. Joavku Soapmásat lea ožžon ođđa, nuorra oasseváldiid ja joavkkus leat dál 17 oahppi. Mii bargat ođđa sámi dramáhtalaš čájálmasain Sunná šiella, maid Unjárgalaš Inger Margrethe Oskal lea čállán. Manus lea hábmejuvvon Sámi mánáid-TV ráiddu Májjá ja Sujujujjá vuođul, ja lea heivehuvvon min lávdái. Mii deaivvadat Sunnáin, guhte láhppo meahccái ja áimmahuššo gufihttariin, ja gos Stálu eamit Luhtták addá sutnje vara, nu ahte son vajálduhttá gii son lea. Dáhpáhus lea riidu gaskkal bahá ja buori, ja jearaldat lea ahte lihkostuvvaba go Sunná oabbá ja viellja, Májjá ja Mihkkal, oažžut su ruovttoluotta?

Dán háve bargá kulturskuvla ovttas Kultur i Tromsiin, ja midjiide boahtá riikaoassejuoigi Inga Juuso veahkkin. Son oassálastá sihke juogin ja neavttárin. Klemet Anders Buljo ráhkada musihka ja čuojaha čájálmasas. Gieldda duojáris Hilly Sarres lea ovddasvástádus biktasiidda. Biktasat leat hábmejuvvon, ja galget dál gorrot. Dát teáhterbuvttadeapmi šaddá leat dat gelddoleamos čájálmas maid Deanu kulturskuvla goassige lea dahkan visuálalaččat, dan sivas go mii eat leat goassige ovdal nu garrasit deattuhan biktasiid. Gorrojit oktiibuot 30 biktasa. Beaivváš Sámi teáhter leamaš nu árvvas ahte lea fállan midjiide veahki scenografiijain. Sin fásta scenográfa, teknihkkár ja čuovgaalmmái Bernt Morten Bongo boahtá Detnui juovlamánus.

Mis leat stuorra vurdámušat dán čájálmassii danin go kulturskuvla measta álo lea bargan scenografiija haga.  Mii lea boahtán bures johtui hárjehallamiiguin, ja mis lea álgočájálmas njukčamánu 3. beaivve tiibmu 18:00 birasvisttis.