Language Language Language Visning: A A A A A
toppbilde

Suoidnemánu 1.b 2019 čálii Sinaida K. Saua

ID 828 - Kulturskuvlaoahpaheaddji / Teáhter-/Dánsapedagoga 100 % virgi

ID 828 - Kulturskuvlaoahpaheaddji / Teáhter-/Dánsapedagoga 100 % virgi

Deanu gielddas leat sullii 2900 ássi. Gielda lea Nuorta-Finnmárkkus ja lea rádjagielda Supmii. Deatnu, vuotna ja duottar leat ráđđejeaddji luondduelemeanttat ja báidnet ássama kultuvrra ja ealáhusaid. Gielddaguovddáš lea Deanušaldi ja dat lea johtolatčanastahkan Nuorta-Finnmárkkus ja olbmuid ja iešguđet gielaid ja kultuvrraid deaivvadanbáiki. Gielda lea oassin sámegiel hálddašanguovllus ja sámegiella lea almmolašgiellan dárogiela lassin.

Deanu kulturskuvllas lea rabas 100 % kulturskuvlaoahpaheaddji virgi 01.08.2019 rájes.  50 % virggis lea fásta virgi ja 50% lea gaskaboddosaččat jahkái mas lea vejolašvuohta joatkit. Kulturskuvllas lea ovddemuš fálaldahkan mánáide vuođđoskuvlaagis ja skuvllas leat dál 90 oahppi. Oahpahus dáhpáhuvvá dábálaš skuvlaáiggis. Sámi Mánáid Teáhter / Samisk Barneteater lea oassin kulturskuvlla fálaldagas. Persovdnaresurssat leat 2,5 jahkedoaimma mii odne lea juhkkojuvvon 8 oahpaheaddjái. Kulturskuvllas lea sierra rektor 50 % virggis ja hálddahuslaččat biddjon Ovdánahttinossodahkii.

Bargodoaimmat

Oahpahit teáhterjoavkkuid. Jođihit teáhterproseassaid ovdanbuktimii mas leat buot teáhterfágalaš váikkuhandoaimmat sihke sámegillii ja dárogillii. Mii háliidat ovddemusat nannet mánáid dáidduid juksan dihtii áigumušaid mat orrot leamen veadjemeahttun. Márkanastit čájáhusaid ja ovttas bargat dáiddáriiguin. Válbmet teáhtermátkkiid ja ovttas bargat váhnemiiguin. Vurdojuvvo ahte bargá bargguid iešheanalaččat ovttas earáiguin.

Oahppogáibádusat

Mii ohcat pedagoga geas leat teáhterfágalaš oahppu ja/dahje leat vásáhusat ja dáiddalaš integritehta. Ohccit geain lea earálágan oahppu árvvoštallojuvvojit. Son gii virgáduvvo ferte máhttit sámegiela.

Bálkáhuvvo individuála soahpamušaid mielde.

Dat gii virgáduvvo ferte čájehit dohkálaš bolesduođaštusa vrd.Opplæringsloven § 10-9. Eanet dieđuid oaččut go válddát oktavuođa kulturskuvlarektoriin Ebba Joks tel. bokte 464 00 277 dahje e-poasta: ebba.joks@tana.kommune.no.

Jus don háliidat garvit almmolaš ohcciidlistu čuovvoleamis, de ferte dat vuođuštuvvot ohcamušas. Dieđut sáhttet šaddat almmolažžan vaikke don ieš leat bivdán ahte it háliit leat mielde almmolaš ohcciidlisttas, vrd. offentlighetsloven § 25. Ohcciide dieđihuvvo jus dakkár várrejupmi ii váldojuvvo vuhtii.

Gielda gullá doaibmaguvlui Davvi Romsii ja Finnmárkui gos leat ekonomalaš ovdamunit čatnašuvvon geahpeduvvon verrui, vearuhis studieloatnageahpideapmi ja nuvttá elrávdnjevearu golahus. Muđui gustojit virgáideamis lágat, soahpamušat ja njuolggadusat. Ealáhatkássa miellahttuvuohta. Gielda sáhttá veahkehit gávdnat ássanvisti. Fárrengolut buhttejuvvojit gielddanjuolggadusaid mielde.

Mii vuostáiváldit dušše elektrovnnalaš ohcamušaid. Elektrovnnalaš ohcanskovis fertet don deavdit dieđuid oahpahusas ja bargovásáhusain. Ii leat doarvái dušše deavdit iešdieđuid ja lasihit dasa CV’. Referánssat fertejit almmuhuvvot. Almmuhuvvon oahpahus ja bargovásáhusaid duođaštusat fertejit čájehuvvot bargojearahallan oktavuođas

Her kan du søke på stillingen

Skovvi ii sáhte gieđahallat olgoriika telefovdna ja poastačujuhusaid, danne fertejit ohccit geain lea poastačujuhus olgoriikkas geavahit čuovvovaš čujuhusa: Rådhusveien 24 9845 Tana. Rivttes čujuhus ja telefovdnanummir almmuhuvvo čilgehusruvttos heaggadieđuid vuolde.

Ohcanáigemearri 14.07.2019

Cavgil skihpárii Čálit