Language Language Language Visning: A A A A A
toppbilde

Láhkaásahusevttohus skohtermáđiide gulaskuddamis

Deanu gielda lea ráhkadan ođđa láhkaásahusevttohusa skohtermáđiide. Evttohus lea dál sáddejuvvon gulaskuddamii. Áigemearri buktit cealkámuša lea skábmamánu 20. b. 

Meahcásteami ja ealáhusa váldolávdegoddi mearridii čoahkkimis golggotmánu 6. beaivve 2016 sáddet láhkaásahusevttohusa gulaskuddamii ja seammás bidjat dan almmolaš geahčadeapmái áigodahkii 10.10 - 20.11.2016. Gieldda váldoulbmil leamaš oažžut otná skohtermáđiid ja jávrriid maid alde beassá bisánit, nannejuvvot láhkaásahusaide, vai beassat daid geavahišgoahtit boahtte dálvvi. Lea maid evttohuvvon rievdadit muhtun máđiid. 

Gulaskuddandokumeanta mii lea viđjjis vuolábealde, čilge rievdadusaid mat leat evttohuvvon otná máđiide, ja maiddái váikkuhusaid iešguđetge berošteddjiide. Mielddusin lea maiddái láhkaásahus, kárta, riedjaguorahallan ja evttohusat mat leat boahtán gildii revišuvdnabarggu olis. Mii bivdit cealkámušaid evttohussii ovdal skábmamánu 20. b. 2016. 

Rievdadusat mohtorjohtaluslágas ja mohtorjohtalusláhkaásahusas, mat mearriduvvojedje 2015.s, mielddisbuktet ahte otná skohtermáđit Deanus fertejit árvvoštallot ođđasit ja ollásit mearriduvvot ođđasit. Gáibádussan lea ahte máđiid geavaheapmái galget dahkkot mearrádusat, namalassii leaktomeriid ja vuodjináiggiid hárrái. Gáibádussan gielddaide lea ahte máđit galget merkejuvvot ja galget čállot dieđut máđiid birra, muhto de ožžot maid gielddat vejolašvuođa geavaheddjiin gáibidit mávssu, vai besset gokčat doaimmahangoluid. 

Gáibádussan lea maid ahte gielddat galget guorahallat makkár váikkuhusat máđiin leat olgunastimii ja luondduhivvodahkii guovlluide gos máđit leat. Dát, nu gohčoduvvon influeanasaguovllut, leat dat guovllut maidda skohterjohtalus váikkuha, omd. dat guovlu gos riedja váikkuha. Guorahallamat ja árvvoštallamat bohtet ovdan gulaskuddandokumeanttain mat leat mielddusin. 

Meahcásteami ja ealáhusa váldolávdegoddi mearridii láhkaásahusrevišuvdnabarggu rámmaid 13.04.2016. Dát láidestusat leamaš vuođđun go Deanu gielda ráhkadii láhkaásahusevttohusa oktan gullevaš gulaskuddandokumeanttain, mii mearriduvvui váldolávdegotti čoahkkimis 06.10.2016. Evttohus sáddejuvvo dál gulaskuddamii ja biddjo almmolaš geahčadeapmái áigodahkii 10.10. - 20.11.2016.