Language Language Language Visning: A A A A A
toppbilde

Báike- ja gilinamat lassin geaidnočujuhusaide Deanus

Deanu gielda hálida ahte báike- ja gilinamat mat leat geavahusas gielddas galget sáhttit geavahuvvot geaidnočujuhusain nu mo ovdal. Evttohus báike- dahje gilinammii mii galgá sáhttit geavahuvvot lassin geaidnočujuhussii sáddejuvvo gulaskuddamii. Áigemearri addit cealkámuša lea 29.09.2016.

TDeanu gielda hálida ahte báike- ja gilinamat mat leat geavahusas gielddas galget sáhttit geavahuvvot geaidnočujuhusain nu mo ovdal (lassin geaidnočujuhusaide). Fuolahusa, bajásšaddama ja kultuvrra váldolávdegoddi (HOOK) dagai dán mearrádusa čoahkkimis 06.09.2016. Lávdegoddi sáddii maid báike- ja gilinamaid evttohusaid, mat sáhttet geavahuvvot lassin čujuhusaide, gulaskuddamii giliservviide ja eará servviide ja ovttastusaide gielddas geain veadjá leat beroštupmi dáidda áššiide. Dán dihtii Deanu gielda bivdá cealkámušaid dasa mii guoská báike- ja gilinammaevttohusaide maid sáhtášii geavahit lassin geaidnočujuhusaide (geahča viđjji vuollelis). Cealkámušat sáddejuvvojit Deanu gildii, Rådhusveien 24, 9845 TANA, dahje e-poastta bokte čujuhussii postmottak@tana.kommune.no ovdal 29.09.2016.

Jus báike- dahje gilinamma geavahuvvošii lassin geaidnočujuhussii, de šattašii čujuhus oaidnit omd. ná:

Uvllá Olsen
Tanafjordveien 1543
Fávlemohkki dahje Väylänmukka dahje Holmfjell

9845 DEATNU

Dalle go mearridedje čujuhusnamaid buot váldogeainnuide Detnui, divaštallui ahte lei go galgat juohkit geaidnogaskkaid sierra čujuhusosiide, main ledje ráját seammá sajis go giliráját, vai galggai go leat okta čujuhusoassi olles geaidnogaskii. Daláš Bajásšaddan- ja kulturlávdegoddi (OKU) mearridii čoahkkimis 21.03.2013 juohkit váldogeainnuid Deanu gielddas dušše guđa oassái. Seammá dahkkui bartaguvlui Deanuvuonas, mii juhkkui dušše guovtti čujuhusoassái.

Maŋit áigge leat ollugat ohcalan báike- ja gilinamaid čujuhusain, dan sivas go dat lea dehálaš oassi deatnulaččaid identitehtas. Rievdadus matrihkalláhkaásahusas, mii biddjui fápmui 01.01.2016, addá vejolašvuođa geavahit báike- ja gilinama lassin geaidnočujuhussii. Dát lea duogážin HOOK-lávdegotti mearrádussii. Lea vejolaš válljet moadde, bálddalas nama lassičujuhussan. Dát mearkkaša ahte sáhttá geavahit sámi-, dáru-, dahje kvena nama dan seammá báikkis/gilis.

Muhtun báike- ja gilinama leat jo mearriduvvon čujuhusnamman, nu mo omd. Masjokdalen, Søndre Luftjok ja Luftjokdalen. Danin ii leat dárbu dáid namaid atnit lassin geaidnočujuhusaide. Danin leat listtus, mii lea mielddusin, dušše dat báikkit ja gilit mat otne eai leat jo geaidnočujuhussan.

Kártadoaimmahat ii leat vel mearridan čállinvugiid luonddunamahusaide mat leat vuođđun báike- ja gilinamaide Deanu gielddas, muhto vuordimis dát dahkko čakčamánus. Dan maŋŋá sáhttá gielda (HOOK) mearridit čállinvuogi báike- ja gilinamaide. Mii doaivut ahte dát sáhttá dahkkot HOOK-čoahkkimis 11.10.2016. Easkka dan maŋŋá sáhttá gielda (HOOK) mearridit geavahit báike- ja gilinamaid lassin geaidnočujuhusaide.