Language Language Language Visning: A A A A A
toppbilde

Ođđa mearrádus Fylkkamánnis. 3 ođđa skohtermáđiis lea guhkiduvvon rahpanáigi

Orohaga 13 jođiheaddji, Per A. Gaup, válddii ikte, miessemánu 6. beaivve, oktavuođa Fylkkamánniin ja dieđihii ahte sin gáibádus giddet dihto skohtermáđiid ferte leat áddejuvvon boastut. Sii eai leat oaivvildan ahte áššáiguoskevaš máđiit eai sáhte leat rabas guhkit, earret go dat oassi Sirpmá máđiis mii guoská sin orohahkii.

 

Láhkavuođuin § 9:s riikaviidosaš láhkaásahusas mohtorfievrogeavaheamis mehciin ja jikŋon čázádagain fápmui biddjon miessemánu 15. beaivve 1988, sáhttet čuovvovaš máđiit Deanu gielddas leat rabas gitta miessemánu 21. beaivve rádjai 2013:

  • Máđii 2a, Sirpmás Bihtošjávrái
  • Máđii 7, Šuoššjogas Idjavuonduoddarii
  • Máđii 8, Stuorrajogas Stuorra Illásii (Girdiura rádjai)

Dát leat lassin daidda máđiide main lea jo mearriduvvon guhkit rahpanáigi.

Eavttuide, eará árvvoštallamiidda ja listui rabas skohtermáđiin, čujuhat mearrádussamet beaiváduvvon miessemánu 3. beaivve 2013.

Fylkkamánni mearrádus lea láhkaásahusmearrádus, ja dan ii sáhte moaitit, vrd. hálddahuslága njuolggadusat.