Language Language Language Visning: A A A A A
toppbilde

Deanu joatkkaskuvla ja Finnmárkku LOSA ferte bisuhuvvot

Deanu ovdagoddi áirasiiguin Bargiidbellodagas, Felleslista – Oktasašlisttas, Guovddášbellodagas, Olgešbellodagas ja Ovddádusbellodagas, lea ráhkadan ovttajienalaš cealkámuša Deanu joatkkaskuvlla ja Finnmárkku LOSA birra.
Landbruksskolen

Deanu gielda lea hui behtton dain proseassain mat leat čađahuvvon Finnmárkku joatkkaskuvllaid skuvlastruktuvrra guorahallama olis. Dása guoská ee. fylkkaráđđealbmá evttohus heaittihit Deanu joatkkaskuvlla. Fylkkadikki mearrádus geahpedit LOSA lei maid ovdamearkan heajos prosessii.

Mii diehtit dan ahte fertejit biddjot johtui doaimmat mat nannejit kvalitehta olles oahpahussuorggis, vai eambbogat čađahit oahppoáigodaga normerejuvvon áiggis. Dás sáhtášii fylkkagielda leat njunnošis lágideamen ovttasbarggu gielddain gávdnan dihtii buriid čovdosiid oktasaš hástalusaide. Ovttasbargu gaskkal fylkkagieldda, LOSA- gielddaid ja ealáhuseallima lea hui erenomáš. Dás geavahuvvo ođđaáigásaš teknologiija geahpedit váttisvuođaid maid guhkes gaskkat dagahit, ja lea maiddái hui lagaš ovttasbargu bargoeallimin oahpu hárrái daid sierra gielddain. Fylkkagielda berrešii guorahallat ahte lea go dá modealla maid sáhtášii geavahit dábálaš joatkkaskuvllas.
Deanu gielda oaivvilda ahte jus Deanu joatkkaskuvlla heaittihuvvo ja jus LOSA heajosmahtto, de dat ii buvtte buoret bohtosiid dahje dagat ahte eambbogat čađahit joatkkaoahpu Finnmárkkus normerejuvvon áiggis. Dát baicce dagaha ahte eanet nuorat fertejit fárret eret ruovttugielddaineaset ja orrut láigolanjain guovlluin gos leat  ollu studeanttat. Dát dagaha stuorra olggosgoluid ja bearrašiidda gártá váddásat čuovvut nuoraideaset skuvladili.
Deanu joatkkaskuvla lea áidna skuvla fylkkas mii fállá ohppiide oahpu árktalaš eanadoalus ja luonddugeavaheamis. Mearriduvvon eanadoallo- ja borramušdieđáhusas boahtá ovdan ahte ráđđehusas dát lea stuorra ja dehálaš vuoruhansuorgi. Dán dieđáhusas lea mihttomearri lasihit borramušbuvttadeami Norggas juohke jagi dás ovddosguvlui. Jus dán mihttomeari galgá juksat, de ferte deattuhit gelbbolašvuođa huksema dán ealáhusas, ii ge geahpedit, nu mo fylkkaráđđealmmái evttoha. 
Deanu gielda doarju borramušdieđáhusa mihttomeari ja mii sávvat ahte Finnmárkku fylka hálida maiddái ahte boahtteáiggis galgá leat borramušbuvttadeapmi min guovlluin. Dán oktavuođas lea Deanu joatkkaskuvllas dehálaš rolla regionála ovdánahttimis.
Deanu joatkkaskuvla lea fargga 100 jagi, ja skuvllas leamaš oppa áigge dehálaš rolla das ahte eanadoallu háhká barggu báikkálaččat ja buriid borramušaid, nu go omd. Deanu kesam, Varangerlam ja Pasvik vuostá.
Dan dihtii leat mii hirpmástuvvan go fylkkaráđđealmmái evttoha heaittihit dán skuvlla. Árktalaš eanadoallu ja luonddugeavaheapmi leamaš guhká garra dilis, ja ealáhus dárbbaša dan gelbbolašvuođa maid Deanu joatkkaskuvla buktá oažžun dihtii nuppástumi ja regionála ovdánahttima.
Deanu gielda bivdá fylkkadiggepolitihkkáriid čájehit ahte áigot vuoruhit Finnmárkku eanadoalu dakko bokte ahte bisuhit ealáhusa deháleamos oahppoásahusa fylkkas ja ahte LOSA- fálaldat ovdánahtto.