Language Language Language Visning: A A A A A
toppbilde

Hui duhtavaččat Sieiddá skuvllain

Sieiddá skuvla lea buorre skuvla. Dán oaivvildedje buohkat geat ledje boahtán váhnenráđi bargolávdegotti čoahkkimii duorastaga skábmamánu 25. beaivve. Ráđis leat lahtut goappašiid luohkáin skuvllas. Čoahkkimis bohte garra reakšuvnnat Ságat-áviissa áššái skuvlla birra dáid maŋimuš beivviid. Ii oktage dovdan duohtavuođa nu mo áviisa dan ovdanbuvttii.

 

Ráđđealmmái Jørn Aslaksen háliidii gullat váhnemiid vásáhusaid skuvlla ektui, ja bođii ovdan ahte váhnemat ledje hui duhtavaččat skuvllain, ja skuvlla áŋgirvuođain čoavdit váttisvuođaid. Vaikko vel máŋggas ledje ge suhttan ja roahppánan dan geažil mo muhtun váhnemat“váhnenjoavkkus” ledje mannan áššiin mediai, de ávžžuhuvvui leat hui várrugas vástideames kritihka. Ii boađe geasage buorrin jus váhnemat soađáskit media bokte. Daddjui maiddái ahte lea buorre buot organisašuvnnaide ahte muhtumat gehččet kritihkalaččat mo áššit doibmet. Dát lea eaktun jus galgá sáhttit buoridit doaimma.
Čoahkkimis muitalii hoavda, Else Marie Seim, skuvlla rutiinnaid birra, váhnenovttasbarggu, givssideami, erenomáš ohppiid ja erenomášoahpahusa birra. Zero- prošeavtta olis lea skuvla ee. geavahan guokte jagi hábmet doaibmaplána givssideami vuostá. Dát lea dahkkon ovttas fágaolbmuiguin ja guvttiin eará skuvllaiguin kránnjágielddas. Dán bargui oassálaste sihke oahppit ja váhnemat. Vaikko vel rutiinnat leat buorit, de lea dehálaš ahte dat čuvvojuvvojit.  
Loahpalaččat ovdanbukte mannan giđa ohppiidiskosiid bohtosat. Dát iskosat čađahuvvojedje buot ohppiin 5. – 10. luohkás, ja čájehuvvui ahte oahppit loktet bures skuvllas. Dušše golbma oahppi ledje vástidan ahte eai loavtte skuvllas. Boahtte giđa áigu skuvla čađahit geavaheaddjiiskosa váhnemiid gaskkas.

Referáhtta váhnemiid bargolávdegoddečoahkkimis biddjo gieldda neahttasiidduide dalán go lea gárvvis.