Language Language Language Visning: A A A A A
toppbilde

Buorit juovllat ja buorre ođđajahki!

Deanu sátnejođiheaddji sávvá buot Deanu gieldda ássiide buriid juovllaid ja buorre ođđa jagi!
Juletre utenfor menighetshuset ved Tana bru

Sátnejođiheaddji sávvá gieldda ássiide ráfálaš juovlaávvudeami.

Hálidan giitit gieldda bargiid, eaktodáhtolaš bargiid ja áŋggirdeddjiid, geat leat viššalit bálvalan ássiideamet jagis mii lea vássán. Dán jagi hálidan erenomážit giitit báikkálaš politihkkáriiddámet. Sii bálvalit Deanu gieldda viššalit sihke smávit ja stuorát áššiin. Mun dieđán ahte sii geavahit ollu áiggi dáid doaimmaide vai min servodat šattašii buoret.
Jagis 2012 dáhpáhuvve máŋga smávit ja stuorát ášši gielddasteamet. NHO nammadii ealáhuseallima Deanu gielddas 7. eanemus gánnáhahtti olles Norggas, ja gieldda fitnodagat leat issorasat huksestallan. Gieldda heaibu guovttos Signe Marie Fidje Store ja Maja Erlandsen šattaiga eurohpámeašttirin. Ovttas mii leat rahčan ja nagodan doalahit iežamet joatkkaskuvlaoahppofálaldaga LOSA bokte ja leat nagodan bissehit áitagiid heaittihit Deanu joatkkaskuvlla (eanadoalloskuvlla).
Deanus lea ollu miellagiddevaš dáhpáhusat vuordimis boahtte jagi. Gielda lea álggahan dan stuorámus ja deháleamos investerema máŋgga jahkái. Leat huksegoahtán ođđa fuolahusguovddáža ássiideamet várás Deanus geat dárbbašit divššu ja fuolahusa, ja guovddáš galgá gárvánit 2014 álggus. Dán mii dahkat dan dihtii go mii hálidat ahte min boarrásiin galgá leat nu buorre dilli go vejolaš, orro dal fuolahusguovddážis dahje ruovttus. Mii diehtit ahte sáhttet šaddat ollu hástaleaddji rievdadusat dán olis boahttevaš jagiid. Muhto buriin ovttasbargguin singuin geat dárbbašit divššu ja fuolahusa, oapmahaččaiguin ja bargiiguin, de lean viissis ahte dát manná bures.
Mii lávket dál ođđa gelddolaš jahkái mii buktá ođđa gelddolaš vejolašvuođaid ja hástalusaid. Ávžžuhan buohkaid áimmahuššat guđet guimmiid ja sávan buohkaide ráfálaš juovla- ja ođđajagiávvudeami.
 
Ustitlaš dearvvuođaiguin
Frank Martin Ingilæ
Sátnejođiheaddji - Ordfører