Bargu gielddaoasseplánain Luovttejohka – Deanušaldi – Skiippagurra guovddášguovlu álggahuvvo fas
Ovdagoddi meannudii ášši čoahkkimisttis 14.10. ja mearridii joatkit plánaproseassain ja sáddet plánaprográmma evttohusa gulaskuddamii. Seammás mearridii ovdagoddi ahte gielda galgá álggahit golbma muddenbarggu – guokte industriija várás ja ovtta ássanguovllu Skiippagurrii, ja ávžžuhii Mesta AS’ álggahit muddema dan nammii ahte viiddidit Lišmmajoga čievravieččahaga.
Lea viiddis bargu mii dál fas álggahuvvo. Bargu gielddaoasseplánain álggahuvvui 2004 čavčča, ja evttohus sáddejuvvui ovddalgihtii gulaskuddamii 2006:s. Das rájes ii leat mihkkige dahkkon dainna bargguin dan sivas go leamaš unnán bargit plánenbarggus.
Evttohus plánaprográmmii (plána plánaprosessii) sáddejuvvo dál gulaskuddamii. Plánaprográmma čilge plána ulbmila, plánaproseassa ja mo olbmot sáhtte oassálastit. Prográmma čilge maiddái guorahallandárbbuid (čuozahusguorahallamat). Plánaprográmmii lea biddjon mielddusin ođasmahttojuvvon veršuvdna plánačilgehusas, mii lei sáddejuvvon ovddalgihtii gulaskuddamii 2006:s. Das čilgejuvvo dárkilit plána ulbmil ja huksenguovllut.
Gielda sávvá ahte olbmot buktet cealkámušaid ja evttohusaid. Dađi árat, dađi buoret. Lágiduvvo álbmotčoahkkin ášši birra gaskavahko skábmamánu 17. beaivve tii. 18.00 gielddastivralanjas Deanu ráđđevisttis.
Mearkkašumit ja evttohusat plánabargguide fertejit sáddejuvvot ovdánahttinossodahkii Deanu gildii, 9845 Deatnu, dahje e-poastta bokte čujuhussii postmottak@tana.kommune.no, ovdal juovlamánu 6. beaivve 2010.
Vuollelis gávnnat evttohusa plánaprográmmii, ođasmahttojuvvon evttohusa plánačilgehussii, doaibmabidjočilgehusa Lišmmajoga čievravieččahahkii, gielddaoasseplána areálageavaheami ođasmahttojuvvon plánasárggastus, ja maiddái girdigova mii čájeha muddenbargguid rájáid. Dokumeanttat biddjojit maiddái Deanu ráđđevistái ja Tanatorgii.