Skoler i Tana

Language Language Language Visning: A A A A A
toppbilde

Anne Lise Varsi

majjen kare emilie ja annelise.jpg

Veaháš luođi birra ja mu Anne-Lise Varsi birra,

Deanu kulturskuvlla juoiganoahpaheaddji.

 

Luohti lea hirbmat buorre “skibir” gean don sáhtát váldit mielde viidásat iežat eallimii! 

Luohti lea maid hui buorre molsašupmi árgabeaivvis! 

Luođi sáhttá maid geavahit ollu eará áššiide maid. -terapiijan, -illun, -,morašis, -buoriid jurdagagidda,
- dat addá fámuid,- ja áinnas lihkku. + ollu eará! 

Mun lean gullan luđiid olles iežan mánnávuođa. Mu áhku juoiggai dávjá jaskadit,
go ahkidušai duoddariidda ja go muitádii iežas lagamuččaid.
Mu eanu álo juoiggai go deaivvai skihpáriid gean ii lean deaivan guhkes áigái,
nie lei su vuohki dearvvahit, ja cealkit buorre oaidnaleami. 

Mun juoigagohten várra 8-10 jahkásažžan, mun gávdnen “skihpára” luođis,
dalle go ledjen okto guhkkin eret skihpáriin. Lean bajásšaddan meahcis dušše mun ja áddjá,
Deanuleagis. Vázzen mánáidskuvlla Sirpmás ja nuoraidskuvlla Sieiddás. 

Eadni dajai muhtumin munnje, go šadden boarrásabbon, - álgge don ge juoigat almmolaččat ovdal go
luohti jávká!! Mun čuvvon su ávžžuhusa.  

Mun lean adjunkta, oahppan ovdaskuvlaoahpaheaddji geas lea luohti, drámá,
muitalandáidu, sámegiella ja duodji lassioahppun. 

Mun lean jahkeviissaid, sullii 20 jagi oahpahan mánáid ja rávisolbmuid juoigat máŋgga sajis Norggas.
Lean mátkkoštan ollu ja doallan konsearttaid ieš guđet festiválain ja eará dilálašvuođain.
Lean illudan sakka dahkat daid ovttas etniin ja nieiddainan ja mii leat ráhkadan luohte CD 2016:s, Alit várri. 

 

Mo oahppat ja makkár vuordámušat 

Oahpahus árbevirolaš luođis 

Gávdnojit elliid luođit, olbmuid luođit, dávviriid luođit, báikkiid luođit ja ollu, ollu eanet.
Jus galgá lihkostuvvat de ferte juoigat, hárjehallat seamma luođi guhkit áigge. 

Luođis ii leat ollu teaksta, eanaš nuohtta (uhccán dahje eai báhpárat)
álkes strofat geavahuvvojit veahkkin vai muitá nuohta.  

Jietnabáttiid liggen lea dehálaš, geavahit čoavjji ja geahppáid veahkkin.  

Oahppat jiena geavahit, gávdnat luohtejiena.  

Oahppi sáhttá geavahit telefovnna báddemiidda ruovttus guldalan hárjehussan. 

Hárjehallan sihke kulturskuvllas ja ruovttus. (Váhnemat fertejit movttiidahttit oahppi hárjehallat) 

Oahppi ferte liikot juoigat almmolaččat, mikrofovnnain ja dan haga.
Lea dieđusge dehálaš ahte fuolaheaddjit movttiidahttet ja árvvus atnet juoigandoaimmaid ja čuovvulit dan,
leat beroštuvvan doaimmas, almma ahte das šaddá deaddu.

Oahppi ferte ieš háliidit oahppat juoigat, dalle lihkostuvvá oahpahemiin.

Oahppi sáhttá mielas árvalit luđiid maid háliida oahppat, omd. bearašluđiid. 

Dá lea liŋka mu oassálastimis Sámeálbmotbeaivvi 2020:s Oslo duopmokirkku ávvoipmilbálvalusas:

https://www.facebook.com/SamiskHusOslo/videos/1039137413134351/UzpfSTMzMjEwOTQyMDE0MTc1MTozMDYyMzg5NDMzNzgwMzg5/

Anne-Lise Varsi juoiganoahpaheaddji Deanu kulturskuvllas