2011' Girkoválga Buolbmát ja Deanu suohkanis
Searvegotteráđi ja bismagodderáđi válggat čađahuvvojit čakčamánu 11. ja 12. beaivve, nammalassii oktanaga gielddastivra- ja fylkkadiggeválggain daid seammá jienastanbiiriin. Válgalanjat leat gieldda válgalanjaid bálddas ja girkoválggain leat seammá rahpanáiggit go gielddas. Searvvadettiin girkoválggaide leat jienasteaddjit mielde mearrideamen geat galget stivret girku boahtteáiggis. Nuorain gaskkal 15,16 ja 17 jagi lea maiddái jienastanvuoigatvuohta, ja ávžžuhuvvo ahte sii geavahit dan. Jienasteaddjit sáhttet maid njuolgga jienastit evttohasaid bismagodderáđđái ja Girkočoahkkimii.
Ovddalgihtiijienasteapmi: lea vejolaš jienastit ovddalgihtii áigodagas borgemánu 10. beaivve – čakčamánu 9. beaivve 2011. Jus jienastat ovddalgihtii eará girkosuohkanis go doppe gosa leat čálihuvvon jienastuslohkui, de fertet dahkat dan ovdal áigemeari, mii lea čakčamánu 2. beaivve.
Báiki gos jienastit ovddalgihtii: searvegotti kantuvrras Deanušalddis, vuos. – bearj., tii. 09.00 – 15.00.
Jienastankoarta: buohkat geat leat čálihuvvon Norgga girku miellahttoregistarii jienastanvuoigatvuođain ožžot jienastankoartta ja eanet dieđuid 31 ja 32 vahku mielde. Dat guhte oažžu jienastankoartta, muhto ii leat miellahttun Norgga girkus, ávžžuhuvvo váldit oktavuođa searvegotti kantuvrrain seammá suohkanis, nu ahte beassat divvut dieđuid Norgga girku miellahttoregistaris. Dát seammá guoská daidda geat leat miellahtut, muhto eai leat ožžon jienastankoartta. Miellahttoregisttar lea vuođđun Girkolaš jienastuslohkui.
Jienastuslogu dárkkisteapmi: áigodagas borgemánu 10. Beaivve – čakčamánu 9. Beaivve lea girkolaš jienastuslohku biddjon dárkkisteapmái searvegotti kantuvrraide, ja daid lea vejolaš fitnat geahčadeamen kantuvrra dábálaš rahpanáiggiin. Lea dušše vejolaš dárkkistit dieđuid mat gusket alcceset, dahje muhtun eará olbmo dieđuid gii lea addán čálalaš doaimmahanválddi dárkkistit dieđuid. Dat guhte oaivvilda ahte ieš dahje muhtun eará lea boastut čálihuvvon dahje hilgojuvvon suohkana jienastuslogus, sáhttá gáibidit ahte válgastivra divvu meattáhusa. Gáibádus galgá buktot čálalaččat ja galgá leat vuođđudallon.
Eambbo dieđut, geahča www.kirkevalget.no.